Дэпутат Шаўчэнка: украінцы і беларусы - блізкія народы, іх не раздзяліць, што б ні адбывалася

Украінскі палітык у першую чаргу падзякаваў кіраўніку беларускай дзяржавы за магчымасць сустрэчы: "Для мяне гэта вельмі высокі гонар. Нават з пункту гледжання дыпламатыі: калі Прэзідэнт рэспублікі, дзяржавы прымае простага дэпутата - гэта вельмі знакавая падзея для мяне".

"Але вы не просты дэпутат, - заўважыў на гэта Аляксандр Лукашэнка. - Вы прыхільнік нашых адносін. Мы ж бачылі гэта. Вы не баяліся ісці супраць цячэння, таму што вы лічылі, што беларуска-ўкраінскія адносіны - гэта на стагоддзі".

На думку ўкраінскага дэпутата, народы Беларусі і Украіны перажываюць нешта падобнае да таго, што адбывалася ў Кіеўскай Русі. "Калі было раздрабленне і знешні фактар, вектар перашкаджаў, і нас, брацкія народы, падзялялі. Потым мы страцілі дзяржаўнасць і былі пад прыгнётам іншых дзяржаў і гэтак далей", - адзначыў Яўген Шаўчэнка.

Разам з тым ён папярэдзіў, што не прэтэндуе на заявы ад імя ўсяго ўкраінскага народа, але выказвае пункт гледжання значнай яго часткі.

"Я лічу, што Украіна і Беларусь - два самыя блізкія народы. І хто б ні быў на чале ўлады, што б ні адбывалася, ніколі гэтыя народы не раздзяліць, - сказаў Яўген Шаўчэнка. - Мяне многія могуць абвінаваціць, нібыта я гавару за ўвесь украінскі народ. Але я ведаю (і сацыялогія гэта паказвае), што ўкраінцы, у сэнсе палітычнай нацыі, вялікай нацыі, не этнічныя ўкраінцы, а ўсіх нацыянальнасцей, якія пражываюць ва Украіне, любяць Беларусь, беларускі народ. І яны ўнутрана, нават тыя, хто не можа сказаць гэтага, супраціўляюцца таму, што адбываецца".

"Я проста выказваю меркаванне гэтых людзей. Я не гавару, што гэта большасць або меншасць. Але іх вельмі шмат. Сацыёлагі паказваюць, што на сённяшні дзень 36 працэнтаў украінцаў хацелі б бачыць вас, Аляксандр Рыгоравіч, сваім Прэзідэнтам ва Украіне. Гэта ж не проста так. Гэта сацыялогія, гэта навука. Таму рабіць такія заявы, як робяць некаторыя нашы палітыкі - недапушчальна", - упэўнены дэпутат.

Ён таксама растлумачыў, для чаго публічна выказвае сваё меркаванне, настойваючы на ўмацаванні беларуска-ўкраінскіх адносін. "Гэта небяспечна, гэта не вітаецца. Я цяпер прыеду, і пэўныя СМІ будуць на мяне гразь ліць, - заўважыў палітык. - Але людзі павінны бачыць некага, хто не баіцца, хто вядзе за сабой і паказвае іншы шлях. Таму што ідзе да таго ва Украіне, што гэтыя наратывы, пастаянны інфармацыйны націск - людзі проста страчваюць веру, надзею на прагматызм, разважлівасць. Уся палітыка, якая накіравана на разбурэнне сувязей, - эканамічных, дружалюбных, з суседзямі - ніколі нічога добрага не прынясе. У мяне палітыка такая: я лічу, што мы павінны наладзіць адносіны праз дыпламатыю з усімі, хто нас акружае".