БСЖ запускае 16 мая акцыю па добраўпарадкаванні ў дварах і на дзіцячых пляцоўках

Беларускі саюз жанчын да Міжнароднага дня абароны дзяцей з 16 мая па 1 чэрвеня праводзіць рэспубліканскую акцыю "Дорым радасць!" па навядзенні парадку на дзіцячых пляцоўках і дваровых тэрыторыях. Аб гэтым БЕЛТА паведамілі ў прэс-службе БСЖ. Старт акцыі будзе дадзены 16 мая. У гэты дзень члены прэзідыума БСЖ на чале са старшынёй Аленай Богдан добраўпарадкуюць дваровую тэрыторыю і дзіцячую пляцоўку па вул. Чачота, 9. Жаночы дэсант зоймецца афарбоўкай надворнага і дзіцячага абсталявання, высадзіць кветкі, размесціць на дрэвах шпакоўні. Работа ў гэты дзень будзе кіпець і ў іншых дварах ва ўсіх абласных цэнтрах. У Брэсце пляцоўкай прыкладання сіл стане тэрыторыя цэнтра карэкцыйна-развіваючага навучання, у Віцебску - двары па вул. Смаленская, 3-3 і 3-4, у Гомелі - пр. Рэчыцкі, 37. У Гродне ў двары па вул. Валковіча, дзе знаходзяцца 4 дзіцячыя дамы сямейнага тыпу, арганізатары не толькі пафарбуюць плоскасныя гульнявыя збудаванні, але і правядуць інтэрактыўную праграму для дзяцей. У Магілёве будуць добраўпарадкаваны дзве пляцоўкі: па вул. Сурганава, 21, дзе размешчаны спецыялізаваны дом дзіцяці для дзяцей з арганічным пашкоджаннем цэнтральнай нервовай сістэмы, і па вул. Аўтазаводская, 28, дзе да добраўпарадкавання пляцоўкі і пасадкі кветак далучацца шматдзетныя сем'і. 16 мая мерапрыемствы акцыі таксама пройдуць у некаторых раённых гарадах і гарпасёлках, але ў асноўным добраўпарадкаванне ў іх будзе весціся ў наступныя дні. Вызначаны адрасы ў Іванаве, Маларыце, Полацку, Наваполацку, Шаркаўшчыне, Бабруйску, Уздзе, Крупках, Салігорску, пасёлку Віцьба і аграгарадку Падлужжа. Па матэрыялах сайта БЕЛТА.