Дэпутаты прынялі ў другім чытанні новыя праекты КоАП і ПВКоАП

Дэпутаты на пасяджэнні чацвёртай сесіі Палаты прадстаўнікоў Нацыянальнага сходу сёмага склікання прынялі ў другім чытанні новыя праекты Кодэкса аб адміністрацыйных правапарушэннях і Працэсуальна-выканаўчага кодэкса аб адміністрацыйных правапарушэннях, перадае карэспандэнт БЕЛТА. Праекты КоАП і ПВКоАП, унесеныя ў Палату прадстаўнікоў Прэзідэнтам, прыняты ў першым чытанні 30 чэрвеня. Праекты Кодэкса аб адміністрацыйных правапарушэннях і Працэсуальна-выканаўчага кодэкса аб адміністрацыйных правапарушэннях з'яўляюцца сістэмаўтваральнымі нарматыўнымі прававымі актамі, якія замацоўваюць прынцыпы і нормы прававога рэгулявання адміністрацыйнай адказнасці і забяспечваюць найбольш поўнае прававое рэгуляванне адпаведных грамадскіх адносін. Пасля прыняцця ў першым чытанні праекты КоАП і ПВКоАП былі значна дапрацаваны з улікам заўваг і прапаноў, выказаных дэпутатамі Палаты прадстаўнікоў, зацікаўленымі дзяржаўнымі органамі, іншымі арганізацыямі, прадстаўнікамі бізнес-супольнасці, навуковымі ўстановамі, грамадзянамі. "Трэба адзначыць, што толькі пры падрыхтоўцы да першага чытання паступіла больш за 800 прапаноў. Пры падрыхтоўцы да другога чытання гэта колькасць была перавышана. Гэта сведчыць аб тым, што праваадносіны, якія рэгулююцца гэтым заканадаўствам, даволі актуальныя, вельмі часта прымяняюцца і закранаюць практычна ўсе слаі грамадства", - адзначыла старшыня Пастаяннай камісіі па заканадаўстве Палаты прадстаўнікоў Святлана Любецкая. Паводле яе слоў, у праектах кодэксаў значная колькасць складаў адміністрацыйных правапарушэнняў карэкціравалася, палавіна з іх загучала па-новаму. "Гэта сведчыць аб тым, што былі асучаснены асобныя падыходы, гэта значыць выключаны былі неактуальныя склады адміністрацыйных правапарушэнняў, зменены падыходы да сістэмы пакаранняў, наогул катэгарызацыя правапарушэнняў праведзена па-новаму. Гэта значыць розныя падыходы на сёння могуць правапрымяняльнікі прымяняць у поўнай меры", - расказала дэпутат. Святлана Любецкая адзначыла асаблівы падыход да адказнасці непаўналетніх. "Калі ў ранейшым законапраекце быў усяго толькі адзін артыкул, то цяпер цэлая глава прысвечана гэтай сферы праваадносін. Больш таго, зроблены значны ўхіл на меры выхаваўчага характару, аж да абмежавання вольнага часу, назначэння такога віду ўздзеяння на непаўналетняга, як прабачэнне пацярпеламу. Гэта сведчыць аб тым, што выхаваўчы ўхіл і ідэалогія гэтага кодэкса накіраваны на павышэнне правасвядомасці, фарміраванне прававой культуры, павагі да закону і інтарэсаў іншых членаў грамадства", - падкрэсліла яна. Новаўвядзеннем кодэкса з'яўляецца ўключэнне такога інстытута адказнасці, як грамадскія работы. "Папраўчыя работы, якія раней былі ўключаны ў кодэкс, выключаны. На сёння асоба, якая адказвае патрабаванням да суб'екта адказнасці, будзе выконваць работы на карысць грамадства, каб загладзіць нанесены ўрон. І, наколькі мы аналізавалі прапановы, якія паступаюць, такі падыход успрыняты, ён вітаецца, і мы думаем, што зможам рэалізаваць гэты інстытут, які вядомы і ў сусветнай адміністрацыйнай практыцы", - упэўнена парламентарый. Змяніўся падыход да пераліку органаў, якія ўпаўнаважаны весці адміністрацыйны працэс. "Колькасць іх значна скарочана, перагледжаны падыходы, зыходзячы з дзеючай кампетэнцыі. Калі закрануць самыя чаканыя прапановы, то сёння прапануецца з кампетэнцыі арганізацыі жыллёва-камунальнай гаспадаркі перадаць права на вядзенне адміністрацыйнага працэсу, звязанага з парушэннем правіл карыстання жылым памяшканнем, органам міліцыі, паколькі яны маюць у дастатковай меры ўладныя паўнамоцтвы. Гэта адпавядае часу і характару ўчыняемых правапарушэнняў у начны час, доступу ў жылыя памяшканні. І мы лічым, такі падыход будзе аптымальным, каб урэгуляваць гэту сферу праваадносін", - дадала Святлана Любецкая. Значна лібералізаваны агульныя падыходы да назначэння пакарання ў адносінах да фізічных і юрыдычных асоб, індывідуальных прадпрымальнікаў. "Але да часткі складаў адміністрацыйных правапарушэнняў, якія датычацца забеспячэння грамадскага парадку, сферы падаткаў, абароту і рынку каштоўных папер, мытных правапарушэнняў, падыходы засталіся даволі сур'ёзныя", - сказала на заканчэнне парламентарый. Па матэрыялах сайта БЕЛТА.