Дэпутаты прынялі ў першым чытанні папраўкі ў законы па пытаннях процідзеяння экстрэмізму

Дэпутаты на пасяджэнні пятай сесіі Палаты прадстаўнікоў Нацыянальнага сходу Беларусі сёмага склікання прынялі ў першым чытанні законапраект "Аб змяненні законаў па пытаннях процідзеяння экстрэмізму", перадае карэспандэнт БЕЛТА. Праект закона ўнесены ў Палату прадстаўнікоў Саветам Міністраў. Праектам прапануецца: устанавіць спецыяльны тэрмін паскоранага разгляду спраў у грамадзянскім працэсе адносна арганізацый з прыкметамі экстрэмізму, а таксама прызнання сімволікі і атрыбутыкі, інфармацыйнай прадукцыі экстрэмісцкімі матэрыяламі. Ён заканадаўча замацоўвае азначэнні тэрмінаў "экстрэмісцкая сімволіка і атрыбутыка", "экстрэмісцкае фарміраванне", пашырае азначэнне тэрмінаў "экстрэмізм", "экстрэмісцкія матэрыялы", ускладае функцыю па каардынацыі дзейнасці суб'ектаў процідзеяння экстрэмізму на органы ўнутраных спраў, пашырае пералік дзяржаўных органаў - суб'ектаў процідзеяння экстрэмізму, устанаўлівае парадак забароны дзейнасці экстрэмісцкіх фарміраванняў. Прадстаўляючы праект закона, генеральны пракурор Андрэй Швед адзначыў, што дакумент вызначае прававыя і арганізацыйныя асновы процідзеяння экстрэмізму ў мэтах забеспячэння бяспекі грамадства і дзяржавы. "Пашырана паняцце "экстрэмізм" за кошт уключэння ў яго такіх прыкмет, як учыненне незаконных дзеянняў у мэтах замаху на незалежнасць, тэрытарыяльную цэласнасць, суверэнітэт, асновы канстытуцыйнага ладу, грамадскую бяспеку. Дадзена новае азначэнне паняцця "экстрэмісцкія матэрыялы", пад якімі прапануецца прызнаваць не толькі інфармацыйную прадукцыю, але і сімволіку, і атрыбутыку, прызначаныя для ажыццяўлення экстрэмізму і яго прапаганды. Органам унутраных спраў і дзяржаўнай бяспекі прадастаўлены паўнамоцтвы па прызнанні груп грамадзян экстрэмісцкімі фарміраваннямі і забароне іх дзейнасці. Пашыраны паўнамоцтвы органаў пракуратуры. Пракуроры абласцей і Мінска разам з генпракурорам надзяляюцца правам прыпыняць дзейнасць арганізацый, падаваць у суд іскі аб прызнанні арганізацый экстрэмісцкімі, забароне іх дзейнасці і ліквідацыі", - падкрэсліў генпракурор. Паводле яго слоў, справы аб прызнанні арганізацый экстрэмісцкімі павінны разглядацца судамі першай інстанцыі ў паскораным парадку. "Гэта значыць, не пазней як за адзін месяц з дня прыняцця заявы", - расказаў Андрэй Швед. Упершыню прадугледжваецца адказнасць за ўдзел у экстрэмісцкім фарміраванні, фінансаванне экстрэмісцкай дзейнасці, вярбоўку, абучэнне і падрыхтоўку асоб для ўдзелу ў такой дзейнасці. "Цяпер крымінальна караецца толькі стварэнне або кіраванне экстрэмісцкім фарміраваннем. Прапануецца ўстанавіць адказнасць за распаўсюджванне заведама несапраўдных звестак аб палітычным, эканамічным, сацыяльным, ваенным і міжнародным становішчы Беларусі, прававым становішчы грамадзян, дзейнасці дзяржаўных органаў улады і кіравання ў публічных выступленнях, у тым ліку ў СМІ і сетцы інтэрнэт. Таксама прадугледжваецца крымінальная адказнасць за заклікі да парушэння тэрытарыяльнай цэласнасці нашай краіны, за распаўсюджванне забароненай інфармацыі ўладальнікамі інтэрнэт-рэсурсаў, якія не з'яўляюцца сродкамі масавай інфармацыі", - дадаў генпракурор. Па матэрыялах сайта БЕЛТА.