Многія пытанні, якія паступілі ад грамадзян на ранейшыя прамыя лініі, ужо ўдалося вырашыць - Качанава

Старшыня Савета Рэспублікі Нацыянальнага сходу Наталля Качанава правяла сёння ў Савеце Рэспублікі прамую тэлефонную лінію, перадае карэспандэнт БЕЛТА. Традыцыйна званкоў было шмат. Яны паступілі практычна з усіх рэгіёнаў Беларусі: Мінскай, Магілёўскай, Гомельскай, Віцебскай абласцей і Мінска. Размова ішла аб жыллёвым і зямельным заканадаўстве, рамонце дарог і добраўпарадкаванні населеных пунктаў. Задаваліся пытанні і аб тым, як аказваецца дапамога пацыентам з COVID-19. Многія беларусы званілі не толькі з праблемамі, але і для таго, каб выказаць падзяку. Так, жыхар Крычава пазваніў, каб выказаць словы падтрымкі кіраўніку дзяржавы. Мужчына падзякаваў Прэзідэнту за тое, што "ён узняў краіну на вышэйшую планку" і адзначыў, што ў Беларусі робіцца многае для падтрымкі ўсіх слаёў насельніцтва. Работа са зваротамі грамадзян і юрыдычных асоб знаходзіцца на асаблівым кантролі кіраўніцтва Савета Рэспублікі і членаў пастаянных камісій. За дзевяць месяцаў члены Савета Рэспублікі разгледзелі 3417 зваротаў, правялі 674 асабістыя прыёмы, 276 прамых тэлефонных ліній. У Савет Рэспублікі людзі часцей звяртаюцца пісьмова. За дзевяць месяцаў колькасць такіх зваротаў павялічылася ў пяць разоў у параўнанні з аналагічным перыядам 2019 года. У большасці выпадкаў пытанні мелі індывідуальны характар і датычыліся жыллёвага фонду і жыллёва-камунальнай гаспадаркі, землеўпарадкавання і землекарыстання, працаўладкавання і занятасці, сацыяльнага і пенсійнага забеспячэння, архітэктуры і будаўніцтва. Атрыманыя звароты прапрацоўваліся з дзяржаўнымі органамі з улікам іх кампетэнцыі, браліся членамі Савета Рэспублікі на кантроль. Асобныя звароты разглядаліся з выездам на месца. Многія сенатары выкарыстоўвалі новы падыход да арганізацыі сваёй работы: у час выезду ў рэгіёны для сустрэч з насельніцтвам і працоўнымі калектывамі праводзілі асабістыя прыёмы грамадзян, іх прадстаўнікоў і прадстаўнікоў юрыдычных асоб. Многія пытанні, якія паступілі ад грамадзян на ранейшыя прамыя лініі, ужо ўдалося вырашыць. Так, у час прамой тэлефоннай лініі да Наталлі Качанавай звярнуўся жыхар Баранавіч з просьбай пасадзейнічаць у працаўладкаванні. Раней грамадзянін звяртаўся да службовых асоб рознага ўзроўню, але пытанне не вырашалася. Пасля прынятых Саветам Рэспублікі мер мужчына працаўладкаваны. Жыхар Брэсцкай вобласці таксама доўгі час не мог уладкавацца на работу. Больш таго, у яго ўзнікла пытанне з жыллём. Таму мужчына вырашыў звярнуцца ў Савет Рэспублікі. "Дапамаглі на працягу месяца-паўтара. Цяпер я працую ў прыватнай фірме ў будаўнічай брыгадзе. Мне таксама прадаставілі месца ў інтэрнаце. Я ўдзячны вельмі за дапамогу", - расказаў ён. Жыхар Пінска звярнуўся ў Савет Рэспублікі з просьбай прадаставіць дачцэ, студэнтцы Гродзенскага дзяржаўнага ўніверсітэта імя Янкі Купалы, месца ў інтэрнаце. Пытанне было аператыўна вырашана. "Я вельмі ўдзячны, што звярнулі на мяне ўвагу і не адмовілі ў маёй просьбе. Магу сказаць толькі вялікі дзякуй. Відаць, што людзі працуюць", - адзначыў мужчына. Зразумела, не ўсе пытанні, з якімі звяртаюцца грамадзяне, можна вырашыць адразу. Некаторыя з іх патрабуюць уважлівай прапрацоўкі з зацікаўленымі і застаюцца на кантролі ў Савеце Рэспублікі. Так, жыхарка Брэсцкай вобласці прапанавала стварыць маладзёжную вёску. Гэта пытанне каардынуе Бярозаўскі раённы Савет дэпутатаў. Вырашаецца пытанне і жыхаркі Мінска, якая звярнулася ў Савет Рэспублікі з ініцыятывай стварыць у горадзе скейтадром і даручыць распрацоўку праекта маладым архітэктарам (напрыклад, студэнтам архітэктурнага факультэта ў выглядзе дыпломных праектаў). Прапанова была накіравана ў Мінгарвыканкам для разгляду з зацікаўленымі. У выніку з Беларускім нацыянальным тэхнічным універсітэтам была дасягнута дамоўленасць аб распрацоўцы студэнтамі архітэктурнага факультэта праекта скейтпарку ў рамках курсавога праектавання вясной 2021 года. Для гэтых мэт вызначаны пляцоўкі ў парку Перамогі. Акрамя таго, членам Савета Рэспублікі паступаюць дзясяткі зваротаў, у якіх грамадзяне дзякуюць парламентарыям за дапамогу і выказваюцца ў падтрымку дзяржаўнай палітыкі, што праводзіцца. Па матэрыялах сайта БЕЛТА.