Органы фінансавых расследаванняў узбудзілі 20 крымінальных спраў за выплаты зарплаты ў канвертах

У Беларусі органы фінансавых расследаванняў узбудзілі 20 крымінальных спраў па ўстаноўленых фактах выплаты зарплаты ў канвертах. Аб гэтым паведаміла начальнік упраўлення дакументальных праверак Дэпартамента фінансавых расследаванняў Камітэта дзяржаўнага кантролю Марына Драбышэўская на анлайн-канферэнцыі ў прэс-цэнтры БЕЛТА. "Па стане на сённяшні дзень ужо органамі фінансавых расследаванняў узбуджана 20 крымінальных спраў па ўстаноўленых фактах выплаты зарплаты ў канвертах. І, напэўна, самыя яскравыя прыклады - гэта факты выплаты зарплаты ў канвертах, якія выкрыты Дэпартаментам фінансавых расследаванняў і нашым упраўленнем па Брэсцкай вобласці ў адносінах да 3 камерцыйных структур Мінска і Брэста. Сума выдадзеных работнікам так званых шэрых зарплат склала больш за Br11 млн", - расказала Марына Драбышэўская. У прыватнасці, паводле яе інфармацыі, Дэпартаментам фінансавых расследаванняў выкрыта проціпраўная дзейнасць заснавальніка і дырэктара аднаго з мінскіх таварыстваў, які пры саўдзельніцтве службовых асоб прадпрыемства схіліў работнікаў аддзела маркетынгу да фармальнай рэгістрацыі іх у якасці індывідуальных прадпрымальнікаў і выплачваў ім зарплату ў канверце пад выглядам даходу ад прадпрымальніцкай дзейнасці. Пры гэтым у працоўных адносінах паміж работнікамі і таварыствам ніякіх змяненняў не адбылося. "Работнікі размяшчаліся на сваіх рабочых месцах па месцы знаходжання таварыства, працавалі поўны рабочы дзень, карысталіся маёмасцю таварыства і ў выпадку кантактаў з кліентамі прадстаўляліся менавіта работнікамі таварыства. У якасці ІП яны не ажыццяўлялі самастойную прадпрымальніцкую дзейнасць і не неслі ніякіх рызык і маёмаснай адказнасці", - растлумачыла начальнік упраўлення. Як дадала Марына Драбышэўская, розніца была толькі ў тым, што пасля рэгістрацыі ў якасці ІП, работнікі аддзела маркетынгу сталі афіцыйна атрымліваць у таварыстве мінімальную заработную плату, якая па стане на сённяшні дзень устаноўлена ў памеры Br400, астатнія выплаты ім пералічваліся ўжо як выплаты індывідуальным прадпрымальнікам. "І вось з выкарыстаннем такой проціпраўнай схемы 21 работніку прадпрыемства са студзеня 2015 года па чэрвень 2021 года было выплачана каля Br10 млн зарплаты ў канверце. З гэтых выплат адпаведна не налічваліся і не выплачваліся абавязковыя страхавыя ўзносы ў Фонд сацыяльнай абароны насельніцтва і падаходны падатак", - расказала яна. Такім чынам, дзяржаве нанесены ўрон у суме Br2,5 млн. У адносінах да заснавальніка і дырэктара гэтага таварыства, а таксама службовых асоб прадпрыемства ўзбуджана крымінальная справа, а на іх маёмасць коштам каля Br4,5 млн накладзены арышт. Паводле інфармацыі эксперта, таксама былі давольна паказальныя ў якасці прыкладу ўстаноўленыя факты выплаты зарплаты ў канверце дырэктарамі двух прыватных прадпрыемстваў, якія ажыццяўляюць дзейнасць у галіне будаўніцтва ў горадзе Брэсце. Устаноўлена, што дырэктары камерцыйных структур для зніжэння памеру абавязковых страхавых узносаў, што падлягаюць выплаце, больш за год выплачвалі заработную плату сваім работнікам двума спосабамі: афіцыйна выплачвалі мінімальную заработную плату з залічэннем на карт-рахункі гэтых работнікаў і наяўнымі сродкамі без адлюстравання па бухгалтарскім і падатковым уліках. Крыніцамі выплат зарплаты ў канвертах былі грашовыя сродкі ў адным выпадку выводзімыя на разліковыя рахункі падкантрольных дырэктару індывідуальных прадпрымальнікаў па фіктыўных дагаворах будаўнічага падраду, а ў другім выпадку выплачваемыя самім жа работнікам у выглядзе кампенсацыі па заключаных з імі фіктыўных дагаворах аб выкарыстанні асабістай маёмасці ў службовых мэтах. "З выкарыстаннем такіх схем кіраўнікі выплацілі работнікам шэрую зарплату ў канвертах на суму ў першым выпадку Br835 тыс., у другім выпадку - Br420 тыс. Устаноўлены дзяржаве ўрон склаў Br292 тыс. і Br147 тыс. адпаведна. Па гэтых фактах у адносінах да дырэктараў узбуджаны крымінальныя справы, а таксама прымаюцца меры па кампенсаванні гэтага ўрону ў бюджэт", - паведаміла начальнік упраўлення. Па матэрыялах сайта БЕЛТА.