Развіццё будаўнічай галіны і сістэмы медабслугоўвання: Кухараў расказаў аб планах на пяцігодку

Старшыня Мінгарвыканкама Уладзімір Кухараў на сустрэчы з калектывам "Гаррамаўтадара" абмеркаваў сёння асноўныя напрамкі сацыяльна-эканамічнага развіцця сталіцы на наступную пяцігодку, паведамляе БЕЛТА са спасылкай на Telegram-канал "Мінск. Афіцыйна". Паводле слоў Уладзіміра Кухарава, асноўнымі планамі гарадскіх улад стане павышэнне эфектыўнасці работы прамысловага сектара, развіццё будаўнічай галіны, сістэмы медабслугоўвання і адукацыі. Таксама будзе зроблены акцэнт на будаўніцтве і мадэрнізацыі медыцынскіх устаноў, новых школ і спартыўных аб'ектаў. Увагу ўдзеляць і якасці паслуг ЖКГ. Згодна з планамі, аб'ём капрамонту жылля ў сталіцы ў 2021 годзе павінен перавысіць 1 млн кв.м, а таксама застацца на такім узроўні ў наступныя гады. У бліжэйшыя 5 гадоў прадоўжыцца далейшае азеляненне горада, а таксама плануецца абнаўленне ўсіх мастоў і пуцеправодаў, якія ў гэтым маюць патрэбу. Рамонт будуць праводзіць за кароткія тэрміны, каб скараціць нязручнасці для гараджан. Як адзначыў у ходзе сустрэчы з калектывам "Гаррамаўтадара" Уладзімір Кухараў, ад арганізацыі ён чакае далейшага развіцця, укаранення сучасных тэхналогій і павышэння якасці выконваемых работ. Па матэрыялах сайта БЕЛТА.