Рэспубліканскі праект "Уладар сяла" пачнецца 15 мая

Беларускі рэспубліканскі саюз моладзі дае старт рэспубліканскаму сямейнаму сельскагаспадарчаму праекту "Уладар сяла - 2021" 15 мая, паведаміла карэспандэнту БЕЛТА сакратар Цэнтральнага камітэта БРСМ Юлія Зінкевіч. "У Міжнародны дзень сям'і ў рэгіёнах краіны стартуе прыём заявак для ўдзелу ў папулярным маладзёжным сельскагаспадарчым праекце. За званне "Уладар сяла - 2021" змогуць пазмагацца маладыя сем'і з дзецьмі, якія пражываюць больш за тры гады ў сельскіх населеных пунктах. Безумоўна, кожная сям'я павінна не толькі працаваць у сельскай мясцовасці, але і весці асабістую падсобную гаспадарку. Хочацца звярнуць таксама ўвагу на ўзроставы парог дарослых удзельнікаў конкурсу - хаця б аднаму - мужу ці жонцы - павінна быць не больш за 31 год на дзень удзелу ва ўсіх турах праекта. Свае заяўкі для ўдзелу ў праекце неабходна накіроўваць у раённыя камітэты БРСМ па месцы жыхарства. Ужо 15 чэрвеня мы будзем ведаць імёны прэтэндэнтаў на ўдзел у абласных турах", - расказала Юлія Зінкевіч. Паводле яе слоў, праект "Уладар сяла" рэалізуецца як рэспубліканскі сямейны сельскагаспадарчы праект з 2008 года і штогод аб'ядноўвае тысячы беларускіх сем'яў. Конкурс складаецца з трох асноўных этапаў: раённага, абласнога і фінальнага - рэспубліканскага, што дае магчымасць прыцягнуць максімальную ўвагу да ўдзелу ў праекце, папулярызацыі яго сярод вясковага насельніцтва. "Абласныя туры праекта завершацца ў бягучым годзе да 1 ліпеня, а рэспубліканскі фінал "Уладара сяла - 2021" адбудзецца 9 і 10 ліпеня на рэспубліканскім свяце "Купалле". Традыцыйна падрыхтоўка да фінальных мерапрыемстваў сельскагаспадарчага шоу - гэта цэлы рытуал. Спачатку сем'і змагаюцца за перамогу ў абласцях. Як і заўсёды, такія святочныя відовішчныя праграмы збіраюць не толькі паўфіналістаў і групы падтрымкі, але і вялікую колькасць гледачоў. Апошні штрых - шліфоўка праграмы перад фінішам. Дарэчы, з мінулага года "Уладар сяла" змяніў пастаянную прапіску на аграгарадок Александрыя Шклоўскага раёна Магілёўскай вобласці, таму рэспубліканскі фінал уключаны ў афіцыйную праграму свята "Александрыя збірае сяброў", - адзначыла сакратар ЦК БРСМ. Рэспубліканскі сямейны сельскагаспадарчы праект "Уладар сяла" садзейнічае замацаванню маладых сем'яў у вёсцы, папулярызацыі сельскагаспадарчай працы, павышэнню прэстыжу сельскагаспадарчых прафесій, умацаванню сямейных традыцый і ўдасканаленню інстытута сям'і. Яго арганізатарамі выступаюць Беларускі рэспубліканскі саюз моладзі, Міністэрства адукацыі, Міністэрства сельскай гаспадаркі і харчавання, Магілёўскі абласны выканаўчы камітэт. Па матэрыялах сайта БЕЛТА.