Шпакоўскі назваў 3 нявырашаныя пытанні канстытуцыйнай рэформы

Сярод асноўных пытанняў канстытуцыйнай рэформы, якія застаюцца пакуль нявырашанымі, - статус і фарміраванне УНС, смяротнае пакаранне і фарміраванне дэпутацкага корпуса. Аб гэтым заявіў палітолаг член Канстытуцыйнай камісіі Аляксандр Шпакоўскі ў час рэгіянальнага форуму "Беларусь адзіная", які праходзіць сёння ў Мінску, завяршаючы ўсебеларускую акцыю аналагічных сустрэч па ўсёй рэспубліцы, перадае карэспандэнт БЕЛТА. "Праект Канстытуцыі прадстаўлены ўжо кіраўніку дзяржавы. Але тры пытанні застаюцца нявырашанымі. Мы думаем іх абмеркаваць на нарадзе з удзелам Прэзідэнта. Гэта статус, прынцыпы камплектавання і кампетэнцыі Усебеларускага народнага сходу; наяўнасць смяротнага пакарання ў крымінальным заканадаўстве нашай краіны; права працоўных калектываў на вылучэнне кандыдатаў у дэпутаты, - сказаў Аляксандр Шпакоўскі. - Усе гэтыя пытанні я ставіў у тым ліку на сустрэчах з прадстаўнікамі палітычнага актыву. Так, некаторыя наватарскія ідэі я атрымаў. І думкі аб тым, чаго хоча палітычная эліта нашай краіны, як бачаць кіраўнікі, лідары меркаванняў на месцах. Цяпер мы ведаем і можам больш упэўнена дзяліцца гэтымі думкамі на нарадзе з Прэзідэнтам". Рэгіянальныя сустрэчы з палітычнай элітай, канструктыўны дыялог, на думку эксперта, важныя для таго, каб мець магчымасць "сшыць" соцыум ва ўмовах палітычнай трансфармацыі грамадства, працэсаў, звязаных з канстытуцыйнай рэформай. "Усё гэта можа закончыцца як стабілізацыяй сітуацыі, так і наадварот, калі апаненты змогуць скарыстацца нашымі памылкамі і слабымі месцамі", - папярэдзіў Аляксандр Шпакоўскі. Ён дадаў, што "да супакойвання на знешнім контуры вельмі далёка". Форум у Мінску сабраў амаль 600 удзельнікаў - прадстаўнікоў дэпутацкага корпуса, ідэалагічнай вертыкалі, прафсаюзнага руху, грамадскіх аб'яднанняў і палітычных партый. Вельмі шмат сярод слухачоў навучэнскай моладзі. У ліку запрошаных экспертаў - вядомыя беларускія палітолагі, эканамісты, сацыёлагі. Па матэрыялах сайта БЕЛТА.