У Беларусі за дзесяць гадоў падлеткавая злачыннасць знізілася ў чатыры разы - МУС

За апошнія дзесяць гадоў у Беларусі падлеткавая злачыннасць знізілася ў чатыры разы, заявіў журналістам старшы інспектар па асобых даручэннях аддзела па арганізацыі работы інспекцый па справах непаўналетніх Міністэрства ўнутраных спраў Васіль Дземідовіч, паведамляе карэспандэнт БЕЛТА. "У структуры органаў унутраных спраў створаны і функцыянуюць інспекцыя па справах непаўналетніх і прыёмнік-размеркавальнік, якія займаюцца прафілактыкай безнагляднасці і правапарушэнняў сярод непаўналетніх, ажыццяўляюць абарону іх правоў і законных інтарэсаў. У выніку сістэмнага і збалансаванага падыходу за апошнія дзесяць гадоў адбылося больш як чатырохразовае зніжэнне падлеткавай злачыннасці - з 5,5 да 1,5 тыс. У бягучым годзе дзіцячая злачыннасць знізілася на 20 працэнтаў. Практычна ў два разы зменшылася колькасць непаўналетніх, якія прыцягваюцца да адміністрацыйнай адказнасці", - расказаў Васіль Дземідовіч. Старшы інспектар нагадаў, што ў Беларусі запушчана другая частка інфармацыйнага рэсурсу pomogut.by - kids.pomogut.by. Яна нацэлена на папярэджанне проціпраўных паводзін непаўналетніх, аказанне дапамогі дзецям, якія ўжо знаходзяцца ў канфлікце з законам. На сайце сабрана самая розная інфармацыя прафілактычнага характару, арыентаваная як на саміх падлеткаў, так і іх бацькоў. У тым ліку па папярэджанні булінгу і кібербулінгу. У 1996 годзе ў Беларусі створана Нацыянальная камісія па правах дзіцяці. Яе прыярытэтнымі задачамі з'яўляецца кантроль за захаваннем правоў, законных інтарэсаў дзяцей, падрыхтоўка навукова абгрунтаваных прагнозаў і вызначэнне стратэгіі папярэджання рызык сацыяльна небяспечнага становішча дзяцей і іх мінімізацыя, прыняцце мер па забеспячэнні сацыяльнага дабрабыту дзяцей у сям'і, павышэнне адказнасці бацькоў за іх выхаванне. "Нацыянальнай камісіяй праводзяцца прыёмы грамадзян, куды можа звярнуцца абсалютна кожны з пытаннямі, якія яго цікавяць", - адзначыў загадчык лабараторыі праблем выхавання асобы навукова-даследчага цэнтра "Нацыянальны інстытут адукацыі" Міністэрства адукацыі Анатоль Глінскі. Як падкрэсліла член Пастаяннай камісіі па правах чалавека, нацыянальных адносінах і сродках масавай інфармацыі Палаты прадстаўнікоў Людміла Здорыкава, у Беларусі створана трывалая заканадаўчая база для абароны правоў і законных інтарэсаў непаўналетніх. "У аснову беларускага заканадаўства пакладзены важнейшыя міжнародныя прававыя дакументы ААН, у якіх змешчаны асноўныя патрабаванні дзяржаўнай палітыкі ў адносінах да сям'і і дзяцей. Дзяржава прызнае дзяцінства важным этапам жыцця чалавека і зыходзіць з прынцыпаў прыярытэтнасці падрыхтоўкі дзяцей да паўнацэннага жыцця ў грамадстве, развіццё ў іх грамадска значнай, творчай актыўнасці, выхаванне высокіх духоўных якасцей, патрыятызму і грамадзянскасці", - сказала яна. Член Пастаяннай камісіі па правах чалавека, нацыянальных адносінах і сродках масавай інфармацыі Палаты прадстаўнікоў Наталля Тарасенка дадала, што заканадаўства ў галіне абароны правоў дзяцей пастаянна ўдасканальваецца. У прыватнасці, 19 лістапада на асенняй сесіі Палаты прадстаўнікоў у другім чытанні прыняты папраўкі ў закон аб грамадзянстве. Заканадаўчым актам прадугледжана магчымасць набыцця грамадзянства ў парадку рэгістрацыі дзецьмі, што нарадзіліся і пастаянна пражываюць у Беларусі, бацькі якіх з'яўляюцца асобамі без грамадзянства. Па матэрыялах сайта БЕЛТА.