У першую змену ў лагерах Беларусі адпачылі ўжо амаль 200 тыс. дзяцей

У Беларусі вырас попыт на паслугі па аздараўленні дзяцей. Аб гэтым журналістам сёння расказаў намеснік начальніка аддзела дзяржаўных закупак і метадычнай работы Рэспубліканскага цэнтра па аздараўленні і санаторна-курортным лячэнні насельніцтва Аляксей Жалянкоў у час прэс-канферэнцыі, якая прайшла ў Мінску, перадае карэспандэнт БЕЛТА. "Летняя дзіцячая аздараўленчая кампанія стартавала ў бягучым годзе з пачаткам дзіцячых канікулаў, хоць звычайна пачыналася з 15 чэрвеня. Прайшоў практычна месяц, і ўжо можна сказаць, што попыт на паслугі па аздараўленні дзяцей перасягнуў усе чаканні. Усяго летам плануецца арганізаваць работу 5561 лагера з дзённым і кругласутачным знаходжаннем і аздаравіць 342 166 навучэнцаў, а ў першую змену ў 4246 лагерах ужо адпачылі 199 989 навучэнцаў", - расказаў Аляксей Жалянкоў. З іх у 3 661 лагеры з дзённым знаходжаннем аздаравіліся 161 422 дзіцяці і ў 585 лагерах з кругласутачным знаходжаннем - 38 567. План па аздараўленні дзяцей у летні перыяд выкананы на 60 працэнтаў. Кансультант галоўнага ўпраўлення выхаваўчай работы і маладзёжнай палітыкі Міністэрства адукацыі Ларыса Емяльянчык звярнула ўвагу, акцэнт зроблены на аздараўленні дзяцей-сірот, дзяцей, якія маюць патрэбу ў дзяржаўнай абароне, а таксама іншых сацыяльна слабаабароненых катэгорый. Больш таго, іх уключаць у карысную і разумную занятасць, прычым яе арганізуюць не толькі ў аздараўленчых лагерах. "Кожны непаўналетні, які знаходзіцца ў сацыяльна небяспечным становішчы або ў адносінах да якога праводзіцца індывідуальная прафілактычная работа, будзе забяспечаны на 100 працэнтаў рознымі формамі занятасці і аздараўлення", - сказала Ларыса Емяльянчык. Паводле слоў Аляксея Жалянкова, на павышэнне попыту на паслугі па аздараўленні дзяцей паўплывала пазітыўная эпідэміялагічная абстаноўка ў лагерах, дзе ўдзяляюць шмат увагі захаванню здароўя дзяцей і прафілактыцы распаўсюджвання каранавіруснай інфекцыі, а таксама матэрыяльна-тэхнічная база, якая з кожным годам паляпшаецца. Так, з 2015 года на набыццё абсталявання, інвентару, правядзенне бягучых рамонтаў у загарадных лагерах было выдзелена каля Br100 млн, а ў гэтым годзе аб'ём фінансавання складзе каля Br15 млн. Па матэрыялах сайта БЕЛТА.