На базе сярэдняй школы № 7 г. Ваўкавыска прайшоў I этап адкрытага Кубка Ваўкавыскага раёна-2020 па спартыўнаму арыентаванню

Імклівае развіццё сучаснага грамадства, пастаяннае паскарэнне тэмпаў жыцця, укараненне навейшых дасягненняў навукі і тэхнікі прывялі да таго, што ў апошні час значэнне фізкультуры і спорту ў нашым жыцці значна зменшылася, а стан здароўя, адпаведна, пагоршыўся. Гэта датычыцца ўсіх слаёў і ўзроставых груп насельніцтва. Таму сёння важнай задачай з’яўляецца далучэнне падрастаючага пакалення да актыўных заняткаў фізкультурай і спортам. Пра тое, што здаровая нацыя — гэта прыярытэт дзяржавы, неаднаразова заяўляў і Прэзідэнт краіны Аляксандр Лукашэнка. Адным з відаў спорту, да заняткаў якім можна і трэба прыцягваць нашу моладзь, з’яўляецца спартыўнае арыентаванне, бо ён амаль не самы даступны як для арганізатараў, так і выхаванцаў. Для арганізатараў асноўным выдаткам з’яўляецца падрыхтоўка якаснай карты. З другога боку арыентаванне не патрабуе вялікіх фінансавых выдаткаў ад бацькоў (напрыклад, на набыццё формы, амуніцыі ці спецыяльнага абсталявання), а ад дзяцей — спецыяльных ведаў, уменняў і навыкаў на момант пачатку заняткаў, выканання якіх-небудзь нарматываў і г.д. Заняткі спартыўным арыентаваннем забяспечваюць для дзіцяці альбо падлетка не толькі пастаянную фізічную нагрузку па яго магчымасцях, але, што немалаважна, развіваюць памяць і мысленне, аператыўнасць ў прыняцці рашэнняў. Цесны кантакт з навакольным асяроддзем з’яўляецца элементам экалагічнага выхавання. Усё гэта дазваляе казаць, што спартыўнае арыентаванне — гэта інтэлектуальны від спорту. З мэтай папулярызацыі арыентавання, прыцягнення да яго навучэнскай моладзі днямі на базе сярэдняй школы № 7 г. Ваўкавыска прайшоў I этап адкрытага Кубка Ваўкавыскага раёна-2020 па гэтаму віду спорту. Арганізатарам стартаў стаў Ваўкавыскі раённы цэнтр турызму і краязнаўства дзяцей і моладзі пры падтрымцы Беларускай і Гродзенскай абласной федэрацый арыентавання і абласнога Палаца творчасці дзяцей і моладзі. Да гэтай падзеі старшынёй абласной федэрацыі арыентавання Эдвардам Ародзем была арганізавана і прэзентавана выстава метадычнай літаратуры. А самі спаборніцтвы ўпершыню прайшлі ў выглядзе арыент-шоў ці міні-арыентавання. Такая форма правядзення была абрана не выпадкова. Бо спаборніцтвы ў выглядзе арыент-шоў праходзяць у цалкам празрыстай для гледачоў і ўдзельнікаў прасторы. Таму арыент-шоў дае магчымасць не толькі прэзентаваць спартыўнае арыентаванне, але і навучыць яго азам пачаткоўцаў. Дыстанцыю для спаборніцтваў падрыхтаваў Дзмітрый Крапіўка, былы выпускнік сярэдняй школы №7, цяпер майстар спорту па спартыўным арыентаванні, намеснік старшыні Беларускай федэрацыі арыентавання, разам з камандай сваіх аднадумцаў: Ганнай Баўшэвіч, Віктарам Сакута і Ганнай Арочка. Дапамогу ім аказалі педагогі раённага цэнтра турызму і краязнаўства. Усяго ў арыент-шоў прынялі ўдзел 149 навучэнцаў устаноў адукацыі раёна і 18 дарослых. Сярод удзельнікаў былі як вопытныя спартсмены, так і тыя, хто ўдзельнічаў упершыню. Спаборніцтвы прайшлі весела і імкліва, як гаворыцца, на адной назе. А пераможцамі ў сваіх узроставых групах сярод дзяцей і падлеткаў сталі Кірыл Талканаў, Анастасія Купраш, Артур Весялоў, Марыя Чудзіна, Аляксандр Навіцкі, Ксенія Гаўрылік, Цімур Ваўчок, Ірына Тараканова, Алена Грыцкевіч і Аляксей Хаміцкі. Падарукі пераможцам і прызёрам былі прадастаўлены Беларускай і Гродзенскай абласной федэрацыямі арыентавання. Дзмітрый Зязюля, педагог ДУА “Ваўкавыскі раённы ЦТіКДіМ” Па матэрыялах сайта раённай газеты "Наш час".