МПЗ растлумачыла парадак прымянення касавага абсталявання з 10 кастрычніка

У міністэрстве адзначылі, што цяпер суб'екты гаспадарання, у якіх узнікае абавязак прымянення касавага абсталявання, зацягваюць тэрміны звароту ў РУП "Інфармацыйна-выдавецкі цэнтр па падатках і зборах" для заключэння дагавораў на рэгістрацыю і інфармацыйнае абслугоўванне такога абсталявання.

"У сувязі з гэтым, улічваючы значную колькасць суб'ектаў гаспадарання, неабходнасць правядзення работ па забеспячэнні сродкаў кантролю падатковых органаў, нестабільную эпідэміялагічную сітуацыю, у мэтах выключэння напружанасці ў прадпрымальніцкім асяроддзі, стварэння камфортных умоў пераходу на выкарыстанне касавага абсталявання, недапушчэння прыпынення імі сваёй дзейнасці, што можа прывесці да недапаступлення плацяжоў у бюджэт, МПЗ лічыць магчымым да 1 лютага 2022 года прымаць наяўныя грашовыя сродкі пры продажы тавараў, выкананні работ, аказанні паслуг такімі суб'ектамі гаспадарання без прымянення касавага абсталявання пры ўмове заключэння да 10 кастрычніка дагавора з Інфармацыйна-выдавецкім цэнтрам па падатках і зборах", - расказалі ў ведамстве.

Разам з тым у МПЗ падкрэслілі, што суб'екты гаспадарання павінны будуць выкарыстоўваць касавае абсталяванне з даты яго падключэння цэнтрам.

Як паведамлялася БЕЛТА раней, такое абсталяванне з 10 кастрычніка абавязалі выкарыстоўваць суб'екты гаспадарання пры гандлі нехарчовымі таварамі на кірмашах, на гандлёвых месцах на рынках; ажыццяўленні разноснага гандлю плодаагародніннай прадукцыяй; выкананні работ, аказанні паслуг па-за пастаянным месцам ажыццяўлення дзейнасці (за выключэннем тэрыторыі сельскай мясцовасці); ажыццяўленні навучання непаўналетніх; аказанні паслуг па прадастаўленні жылых памяшканняў (іх частак) у інтэрнаце і найме жылых памяшканняў, садовых домікаў, дач, у тым ліку для кароткатэрміновага пражывання.

Па матэрыялах сайта БЕЛТА.